İspaniya milli komandası Dünya Kubokunun finalında qələbə qazanaraq tarixində ikinci dəfə dünya çempionu olub.
Bununla komanda 16 ildən sonra yenidən futbolun ən nüfuzlu kubokunu qazanıb və 2024-cü ildə əldə etdiyi Avropa çempionluğundan sonra dünya futbolundakı uğurlu dövrünü davam etdirib. Komandanın əsas simalarından biri olan 19 yaşlı Lamine Yamal karyerasının ilk illərində Dünya Kubokunu qazanaraq diqqət mərkəzinə düşüb. Gənc futbolçu turnir boyu göstərdiyi performansla yeni nəslin ən perspektivli oyunçularından biri kimi qiymətləndirilir.
Çempionluq sayəsində İspaniya 51 milyon ABŞ dolları mükafat əldə edəcək. Dünya Kuboku həmçinin 2018-ci ildən sonra ilk dəfə yenidən Avropa təmsilçisinə qayıdıb. İspaniya indiyədək iştirak etdiyi hər iki Dünya Kuboku finalını qələbə ilə başa vuraraq bu göstəricini də qoruyub saxlayıb.
Komanda turniri bir sıra rekordlarla tamamlayıb. İspaniya ardıcıl 38 oyundur məğlub olmur və bu nəticə Avropa milli komandaları arasında yeni rekord hesab olunur. Bundan başqa, tarixdə ilk dəfə 48 komandanın iştirak etdiyi Dünya Kubokunun ilk qalibi olan İspaniya çempionluğa gedən yolda 8 oyun keçirərək əvvəlki dünya çempionlarından daha çox matç oynayıb.
Finaldan sonra futbol gündəmi yalnız idman nəticələri ilə deyil, marketinq kampaniyaları ilə də diqqət çəkib. KFC, Lionel Messi və Lamine Yamalın sosial şəbəkələrdə geniş yayılan fotosuna istinad edərək McDonald's-a yumorlu göndəriş edib və bu mövzunu reklam kampaniyasında istifadə edib.
Eyni zamanda Adidas iki il əvvəl Messi və Lamine Yamalın birlikdə yer aldığı reklam kampaniyasını yenidən gündəmə gətirib. Brend bununla uzunmüddətli strategiyasını və gənc futbol ulduzlarına erkən investisiya yanaşmasını ön plana çıxarıb.
Huggies isə illər əvvəl Lionel Messi ilə körpə yaşlarında olan Lamine Yamalın birlikdə çəkilmiş məşhur fotosuna istinad edərək “Onlar çox tez böyüyür” mesajı ilə emosional marketinq paylaşımı edib. Kampaniya həm futbol azarkeşləri, həm də sosial media istifadəçiləri arasında geniş maraq doğurub.
Daha çox
Trend
kateqoriyasından
