Media və Yayım Şurasının yaradılması və strukturu təsdiqlənib.
Prezident İlham Əliyevin imzaladığı qanunla Azərbaycanda Media və Yayım Şurasının yaradılması və strukturu təsdiqlənib. Yeni qurum Medianın İnkişafı Agentliyi və Audiovizual Şuranın bazasında formalaşdırılacaq və media və yayım sahəsində əsas səlahiyyətli dövlət qurumu kimi fəaliyyət göstərəcək.
Şuranın fəaliyyət istiqamətləri media subyektlərinin inkişafının dəstəklənməsi, onların iqtisadi müstəqilliyinin gücləndirilməsi, jurnalistlərin peşəkar hazırlığının artırılması və media layihələrinin həyata keçirilməsinə dəstək göstərilməsini əhatə edir. Yeni struktur çərçivəsində media və yayım sektorunun tənzimlənməsi üzrə müxtəlif funksiyaların vahid qurumda cəmləşdirilməsi nəzərdə tutulur.
Qurum eyni zamanda informasiya təhlükəsizliyi ilə bağlı məsələlərdə fəaliyyət göstərəcək, dezinformasiyanın aşkarlanması və qarşısının alınması istiqamətində tədbirlər həyata keçirəcək. Rəqəmsal mediada yayılan məzmunun təhlili də Şuranın əsas funksiyalarından biri olacaq.
Bundan əlavə, Media Reyestrinin aparılması və jurnalist vəsiqələrinin verilməsi Şuranın səlahiyyətlərinə daxil ediləcək. Yeni qurumun yaradılması ilə media və audiovizual yayım sahəsində mövcud idarəetmə və tənzimləmə mexanizmlərinin vahid struktur altında birləşdirilməsi planlaşdırılır.
Daha çox
Breaking News
kateqoriyasından
