Mərkəzi Bank sədri bazarda rəqabət, kredit faizləri və bank sektorundakı dəyişikliklərdən danışıb.
Azərbaycan Mərkəzi Bankının sədri Taleh Kazımov bildirib ki, ölkədə kredit faizlərinin aşağı düşməsi ilk növbədə bank sektorunda rəqabətin güclənməsi və kreditlərə tələbin azalması ilə mümkündür. Onun sözlərinə görə, Mərkəzi Bank kredit faizlərini inzibati qaydada müəyyən etmir və bu göstəricilər bankların maliyyələşmə xərcləri, risklər və bazardakı tələb-təklif əsasında formalaşır.
Taleh Kazımov qeyd edib ki, bank sektorunda əsas problemlərdən biri bazarda təmərküzləşmənin yüksək olması və rəqabətin istənilən səviyyədə olmamasıdır. O bildirib ki, iri bankların faiz və qiymət siyasətində etdiyi dəyişikliklər bütövlükdə bazara təsir göstərir. Mərkəzi Bankın əsas hədəflərindən biri isə yeni iştirakçıların bazara çıxışını asanlaşdırmaq, rəqabət mühitini gücləndirmək və maliyyə xidmətlərinin daha əlçatan olmasına şərait yaratmaqdır.
AMB sədri həmçinin açıqlayıb ki, sentyabr–oktyabr aylarında maaş və pensiya kartları ilə bağlı yeni yanaşmalar tətbiq ediləcək. Hazırda bununla əlaqədar texniki və təşkilati hazırlıq işləri davam etdirilir. Gözlənilir ki, bu dəyişikliklər vətəndaşların bank seçimi imkanlarını genişləndirəcək, banklar arasında rəqabəti artıracaq və nəticədə maliyyə xidmətlərinin keyfiyyətinin yüksəlməsinə müsbət təsir göstərəcək.
Mərkəzi Bank hesab edir ki, rəqabət mühitinin gücləndirilməsi uzunmüddətli perspektivdə kredit şərtlərinin yaxşılaşmasına, bank xidmətlərinin daha əlverişli olmasına və maliyyə sektorunun dayanıqlı inkişafına töhfə verəcək.
Daha çox
Breaking News
kateqoriyasından
