NVIDIA-nın bazar dəyəri ABŞ və Çin istisna olmaqla əksər ölkələrin iqtisadiyyatını geridə qoyub.
Çip istehsalçısı NVIDIA bazar dəyərini təxminən 5.5 trilyon dollara yüksəldərək qlobal texnologiya sektorunda yeni rekord səviyyəyə çatıb. Bu göstərici şirkəti ABŞ və Çin istisna olmaqla dünyanın əksər ölkələrinin ümumi daxili məhsulundan (ÜDM) daha böyük dəyərə sahib korporasiyaya çevirir.
Şirkətin sürətli yüksəlişi əsasən generativ süni intellekt bazarındakı dominant mövqeyi ilə əlaqələndirilir. NVIDIA hazırda AI modellərinin hazırlanması və işlədilməsi üçün istifadə olunan GPU infrastrukturu sahəsində əsas təchizatçılardan biri hesab olunur. Xüsusilə böyük dil modelləri və data mərkəzləri üçün hazırlanan Blackwell və Hopper arxitekturalı çiplərə tələbatın sürətlə artdığı bildirilir.
Maliyyə hesabatlarına görə, NVIDIA son maliyyə ilində təxminən 216 milyard dollar gəlir və 96.6 milyard dollar sərbəst pul axını əldə edib. Analitiklər hesab edir ki, AI infrastrukturuna investisiyaların davam etməsi halında şirkətin gəlirləri yaxın illərdə daha da yüksələ və illik dövriyyə 400 milyard dollar həddinə yaxınlaşa bilər.
Texnologiya nəhəngləri arasında rəqabət də diqqət çəkir. Hazırkı qiymətləndirmələrə əsasən Alphabet, Apple və Microsoft bazar dəyərinə görə NVIDIA-dan geri qalır. Bu vəziyyət AI sektorunun qlobal texnologiya balansını necə dəyişdiyini göstərən əsas nümunələrdən biri kimi qiymətləndirilir.
Daha çox
İnvestisiya
kateqoriyasından
