OpenAI ABŞ birjasına çıxmaq üçün ilkin hazırlıqlara başlayaraq gizli şəkildə S-1 sənədini ABŞ Qiymətli Kağızlar və Birja Komissiyasına təqdim edib.
Bu addım şirkətin ilkin kütləvi səhm təklifi (IPO) prosesinə rəsmi şəkildə daxil olduğunu göstərən əsas mərhələlərdən biri hesab olunur.
S-1 sənədi IPO öncəsi şirkətlərin maliyyə göstəriciləri, biznes modeli, risk faktorları və gəlir strukturu barədə ilkin məlumatları təqdim etdiyi rəsmi qeydiyyat formasıdır. Bu sənəd SEC tərəfindən yoxlanılır və şirkətin birja çıxışı üçün hazırlıq səviyyəsini qiymətləndirməyə imkan verir.
Məlumata görə, OpenAI-nin IPO sonrası bazar dəyərinin 850 milyard dollardan yüksək ola biləcəyi ehtimal edilir. Bu göstərici reallaşarsa, şirkət dünyanın ən yüksək dəyərli texnologiya və süni intellekt şirkətləri sırasında yer ala bilər.
IPO ilə bağlı hələlik dəqiq tarix açıqlanmayıb və prosesin bazar şərtləri və tənzimləyici baxışlara uyğun olaraq mərhələli şəkildə davam etdirildiyi bildirilir. Eyni zamanda süni intellekt sektorunda rəqabətin gücləndiyi, digər iri oyunçuların da birja planlarını gündəmə gətirdiyi qeyd olunur.
OpenAI-nin bu addımı süni intellekt bazarının kapital bazarlarına daha geniş inteqrasiyasının başlanğıcı kimi qiymətləndirilir.
Daha çox
İnvestisiya
kateqoriyasından
