Azərbaycan Yerüstü Nəqliyyat Agentliyinin (AYNA) İdarə Heyətinin sədri Anar Rzayev Bakıda sərnişindaşıma sahəsində tətbiq ediləcək yeni qaydalar barədə açıqlama verib. Onun sözlərinə görə, paytaxt avtobuslarında tələbələr, təqaüdçülər və digər sosial kateqoriyalar üçün nəzərdə tutulmuş güzəştli gediş haqqı mexanizmi yalnız vahid və tam nağdsız ödəniş sistemi qurulduqdan sonra mümkün olacaq.
Anar Rzayev bildirib ki, hazırda bu istiqamətdə mərhələli şəkildə işlər görülür. Məqsəd sərnişindaşıma sistemini müasir standartlara uyğunlaşdırmaq, ödənişlərin şəffaflığını təmin etmək və sərnişinlərin daha rahat şəkildə xidmət almasına şərait yaratmaqdır.
Onun sözlərinə görə, bütün avtobuslarda vahid elektron ödəniş mexanizmi tətbiq edildikdən sonra sosial kateqoriyalara aid sərnişinlər üçün güzəştli tariflərin reallaşdırılması mümkün olacaq. Bu isə həm nəqliyyat xidmətlərinin keyfiyyətinə, həm də ictimai nəqliyyatdan istifadənin daha əlçatan və rahat olmasına xidmət edəcək.
AYNA rəhbəri əlavə edib ki, dövlətin əsas məqsədi sərnişinlərin rahatlığını təmin etmək, müasir və dayanıqlı ictimai nəqliyyat sistemini formalaşdırmaqdır. Bununla yanaşı, güzəştlərin tətbiqi sosial ədalətin təmin olunmasına və əhalinin müxtəlif qruplarının maraqlarının qorunmasına yönəldiləcək.
