Aktyor Keanu Reeves məşhur “John Wick” franşizasının yeni animasiya filmində yenidən baş qəhrəmanı səsləndirəcək.
Lionsgate studiyası layihəyə rəsmi yaşıl işıq yandırıb və Reeves-in John Wick obrazına qayıtması ilə bağlı razılaşma əldə olunub. Film hadisələri ilk ekran işindən əvvəlki dövrdə cərəyan edəcək və qəhrəmanın keçmişinə daha ətraflı nəzər salacaq.
Yeni ekran əsərinin əsas mövzusu John Wick-in məşhur “Mümkünsüz tapşırıq”ı yerinə yetirməsi olacaq. Bu missiya onun Yüksək Şura (High Table) qarşısındakı öhdəliklərindən azad olması və sevdiyi qadın Helenlə sakit həyat qurması üçün vacib idi. Tapşırıq çərçivəsində Wick bir gecə ərzində bütün rəqiblərini məhv etməli idi. Animasiya filmi məhz bu hadisələrin necə baş verdiyini göstərəcək.
Layihənin rejissoru “Ultraman: Rising” və “Kubo and the Two Strings” filmləri ilə tanınan Shannon Tindle olacaq. Ssenari üzərində Ryan və Kaz Firpo qardaşları çalışır. Filmin prodüserləri arasında Keanu Reeves, Chad Stahelski, Basil Iwanyk və Erica Lee də yer alır.
Qeyd edək ki, “John Wick” franşizası indiyədək dörd əsas film və “Ballerina” adlı spin-off ekran əsəri ilə genişlənib. Animasiya layihəsi isə bu kainatın əvvəllər ekranda göstərilməyən hadisələrini təqdim edəcək. Filmin nümayiş tarixi hələ açıqlanmayıb.
