“The Bear” serialı ilə tanınan aktyor Jeremy Allen White-in Marvel Studios ilə Marvel Kinematik Kainatında (MCU) Wolverine obrazını canlandırmaq ehtimalı ilə bağlı görüş keçirdiyi bildirilir.
Məlumata görə, aktyorun yeni “X-Men” filmində əvvəlcə kiçik rolla görünməsi, daha sonra isə növbəti filmlərdə personajın daha geniş hekayə xəttinə daxil olması müzakirə olunur.
Aktyorun bu obraz üçün mümkün namizəd kimi gündəmə gəlməsi sosial şəbəkələrdə də müzakirələrə səbəb olub. Xüsusilə onun təxminən 170 santimetr boyunda olması diqqət çəkir. Çünki Marvel komikslərində Wolverine təxminən 160 santimetr boyunda təsvir edilir. Bu xüsusiyyət personajın ənənəvi görünüşünün bir hissəsi hesab olunur. Bununla belə, Marvel Studios-un aktyor seçimi ilə bağlı rəsmi qərar verdiyi təsdiqlənməyib.
Qeyd edək ki, Wolverine obrazını uzun illər Hugh Jackman canlandırıb. Aktyor 2024-cü ildə ekranlara çıxan “Deadpool & Wolverine” filmində də bu rola qayıdıb. Marvel-in yeni “X-Men” layihəsi üçün isə Jean Grey obrazına Sadie Sink, Cyclops roluna Kit Connor, Professor Xavier obrazına isə Christopher Abbott seçildiyi bildirilir. Wolverine-in yeni ifaçısı ilə bağlı yekun qərar hələ açıqlanmayıb.
Daha çox
Yaradıcılıq
kateqoriyasından
