Azərbaycan Respublikasının Medianın İnkişafı Agentliyi xarici informasiya resurslarında və sosial şəbəkələrdə ölkəyə qarşı yeni dezinformasiya kampaniyasının başladığını açıqlayıb. Agentliyin məlumatına görə, son günlər bir sıra xarici media qurumlarında və sosial media seqmentlərində yayılan xəbərlər faktiki olaraq həqiqəti əks etdirmir və ictimai rəyi çaşdırmağa yönəlib.
Bu materialların bir hissəsində guya Azərbaycanın üçüncü ölkə vasitəsilə Ukraynanı silahlandırması barədə əsassız iddialar yer alır. Digər hissəsində isə Azərbaycanın İsrailə görə Avroviziya Mahnı Müsabiqəsində iştirakdan imtina etdiyi bildirilir ki, bu məlumat da həqiqətə uyğun deyil. Medianın İnkişafı Agentliyi bu kimi iddiaların manipulyativ xarakter daşıdığını, məqsədli şəkildə ictimai rəyin formalaşdırılması üçün yayıldığını qeyd edib.
Agentlik bildirib ki, bu cür dezinformasiya kampaniyaları Azərbaycana qarşı aparılan informasiya müharibəsinin tərkib hissəsidir. Rəsmi qurum ictimaiyyəti belə xəbərlərə tənqidi yanaşmağa, yalnız etibarlı mənbələrdən təsdiqlənmiş məlumatlara əsaslanmağa çağırır.
