Getir-in həmtəsisçiləri 700 milyon dollarlıq iddia ilə məhkəməyə müraciət edib
Türkiyənin sürətli çatdırılma şirkəti Getir-in həmtəsisçiləri Nazım Salur və Serkan Borançılı şirkətin ən böyük investorlarından biri olan Mubadala Investment Company-yə qarşı 700 milyon dollar məbləğində təzminat tələbi ilə məhkəməyə müraciət edib.
İddiaya görə, tərəflər arasında əldə olunmuş razılaşmanın şərtləri pozulub. Qurucular bildirirlər ki, razılaşmaya əsasən FreshDirect, GetirFinans və n11 üzərində nəzarət yenidən quruculara qaytarılmalı idi. Onların mövqeyinə görə, bu öhdəliyin yerinə yetirilməməsi ciddi maliyyə zərərinə səbəb olub.
Məhkəmə sənədlərində xüsusilə Getir-in maliyyə texnologiyaları bölməsi olan GetirFinans-ın dəyəri diqqət çəkir. Bildirilir ki, bu strukturun bazar dəyəri təxminən 510 milyon dollar səviyyəsində qiymətləndirilir. Bu rəqəm iddianın ümumi məbləğinin formalaşmasında əsas amillərdən biri kimi göstərilir.
Məsələ Getir-in son illərdə keçdiyi restrukturizasiya prosesindən sonra gündəmə gəlib. Şirkət sürətli beynəlxalq genişlənmədən sonra bir sıra bazarlardan çıxmış, aktivlərin bölüşdürülməsi və idarəetmə modelində dəyişikliklər aparılmışdı. Hazırkı məhkəmə çəkişməsi isə bu restrukturizasiya çərçivəsində investor və qurucular arasında yaranmış fikir ayrılıqlarını açıq müstəviyə çıxarıb.
Daha çox
Daily
kateqoriyasından
