Google Translate yeni canlı tərcümə funksiyasını beta versiyada istifadəyə verib.
Bu imkan qulaqlıq vasitəsilə real vaxtda tərcümə etməyə şərait yaradır və Gemini süni intellekt modeli ilə dəstəklənir. Funksiya 70-dən çox dili dəstəkləyir və üzərində mikrofon olan istənilən qulaqlıqla işləyir.
Yeni xüsusiyyət istifadəçilərə qarşı tərəfin dediklərini eşitdiyi anda öz dilində dinləmək imkanı verir. Google-un açıqlamasına görə, sistem danışığı tanıyır, tərcümə edir və nəticəni səsli formada təqdim edir. Bu, xüsusilə səyahət zamanı, beynəlxalq görüşlərdə və gündəlik ünsiyyətdə dil baryerini azaltmaq məqsədi daşıyır.
Canlı tərcümə funksiyası Google Translate-in ümumi yenilənmə paketinin bir hissəsidir. Şirkət həmçinin mətn tərcüməsi imkanlarını genişləndirir və tətbiqə yeni dillər əlavə edir. Bu yeniliklər istifadəçilərin dil öyrənməsi və təcrübə qazanması üçün nəzərdə tutulub.
Google bildirir ki, bu funksiya hələ beta mərhələsindədir və mərhələli şəkildə istifadəçilərə təqdim olunur. Canlı tərcümənin dəqiqliyi və performansı real istifadə ssenariləri əsasında təkmilləşdiriləcək. Şirkət bu addımı süni intellekt əsaslı dil texnologiyalarını daha əlçatan və gündəlik istifadəyə uyğun etmək istiqamətində atılan növbəti mərhələ kimi qiymətləndirir.
