Azərbaycan Respublikası İqtisadiyyat Nazirliyinin Tikinti-Təchizat Birliyi Məhdud Məsuliyyətli Cəmiyyəti süni intellekt əsaslı yeni elektron informativ resursun yaradılmasını planlaşdırır. Bu resurs ölkədə fəaliyyət göstərən texnoloji investorlar və startaplar üçün mərkəzləşdirilmiş informasiya platforması rolunu oynayacaq.
Layihənin əsas məqsədi Azərbaycanda mövcud iş imkanlarını, investisiya mühitini və startap ekosistemini xarici istedadlara təqdim edərək onların ölkəyə cəlb edilməsini stimullaşdırmaqdır. Yeni resurs vasitəsilə istifadəçilər ölkədə texnologiya sahəsində mövcud proqramlar, təşviqedici mexanizmlər, təqaüd və dəstək proqramları barədə ətraflı məlumat əldə edə biləcəklər.
Süni intellekt əsaslı bu platforma, həmçinin investorlar və texnoloji şirkətlər üçün Azərbaycan bazarını daha əlçatan və şəffaf edəcək, xarici tərəfdaşların qərar verməsini asanlaşdıracaq. Hazırlanacaq resursun interaktivliyi və məlumatların asan axtarış imkanları ilə, istifadəçilər öz sahələrinə uyğun investisiya və əməkdaşlıq imkanlarını daha səmərəli şəkildə müəyyən edə biləcəklər.
Tikinti-Təchizat Birliyinin rəhbərliyi bildirir ki, bu addım ölkənin startap və texnologiya sektorunun inkişafına dəstək olmaqla yanaşı, beynəlxalq investisiyaların cəlbini də gücləndirəcək. Elektron resursun istifadəyə verilməsi, həmçinin Azərbaycanda süni intellekt texnologiyalarının tətbiqinin genişləndirilməsinə və rəqəmsal transformasiyanın sürətlənməsinə töhfə verəcək.
