IShowSpeed ürəyi istəyənləri çəkmək üçün 11 milyon $-lıq anbar alıb studiya qurur!

IShowSpeed də kontent istehsalı üçün studiya trendinə qoşulub.

Məşhur kontent istehsalçısı və yayımçı IShowSpeed (Darren Jason Watkins Jr.) ABŞ-ın Florida ştatında, Mayami yaxınlığında yerləşən sənaye binasını təxminən 11 milyon dollara satın alıb. Məlumata görə, bina gələcəkdə iri həcmli kontent layihələri, canlı yayımlar və video çəkilişləri üçün xüsusi studiya kompleksi kimi istifadə olunacaq.

Alınan obyekt təxminən 26 600 kvadrat fut (təxminən 2 470 kvadratmetr) sahəni əhatə edir. Bina daha əvvəl, 2022-ci ildə təxminən 8 milyon dollara satılmışdı. Yerli mediada yayılan məlumatlara görə, obyekt tamamilə qara rəngə boyanıb və hazırda daxili məkanın müasir studiya formatına uyğun yenidən qurulması istiqamətində işlər aparılır.

21 yaşlı IShowSpeed karyerasına əsasən oyun yayımları ilə başlasa da, son illərdə futbol, səyahət və real həyat məzmunu ilə qlobal auditoriyasını əhəmiyyətli dərəcədə genişləndirib. Hazırda onun YouTube-da 59,5 milyon, Instagram-da 54,5 milyon, TikTok-da isə 47 milyon izləyicisi var və o, dünyanın ən populyar rəqəmsal kontent yaradıcılarından biri hesab olunur.

Son illərdə iri kontent yaradıcılarının peşəkar studiya və anbar tipli məkanlara investisiya etməsi geniş yayılmış tendensiyaya çevrilib. Bu cür məkanlar onlara eyni anda bir neçə layihə üzərində işləməyə, böyük çəkiliş meydançaları qurmağa, canlı yayımlar təşkil etməyə və istehsal prosesini tam şəkildə öz nəzarətlərində saxlamağa imkan verir. IShowSpeed-in bu addımı da fərdi kontent istehsalının artıq tammiqyaslı media biznesinə çevrildiyini göstərən nümunələrdən biri kimi qiymətləndirilir.

‍