Mingəçevirdə nəhəng tekstil layihəsinin təməli qoyuldu.
Mingəçevir Sənaye Parkında “Textile Horizon” MMC-nin “Tekstil Klasteri” layihəsi çərçivəsində yeni istehsal müəssisəsinin təməli qoyulub. Təməlqoyma mərasimi Prezident İlham Əliyevin iştirakı ilə keçirilib.
Müəssisənin 11,2 hektar ərazidə inşa edilməsi nəzərdə tutulur. Layihəyə əsasən, burada ildə 16 min ton mahlıc, 11 min ton iplik, 7,3 min ton boyalı parça və 11 milyon köynək istehsal olunacaq.
“Tekstil Klasteri” pambığın ilkin emalından başlayaraq iplik, parça və hazır geyim məhsullarının istehsalına qədər uzanan tam istehsal zəncirini əhatə edəcək. Bu baxımdan layihənin müxtəlif mərhələlərinin eyni istehsal kompleksi daxilində həyata keçirilməsi planlaşdırılır.
Müəssisədə istehsal ediləcək tekstil məhsullarının həm Azərbaycanın daxili bazarına çıxarılması, həm də xarici ölkələrə ixrac olunması nəzərdə tutulur. Layihənin Mingəçevir Sənaye Parkında tekstil istehsalının genişləndirilməsinə və pambıqdan hazır məhsula qədər yerli istehsal zəncirinin formalaşmasına töhfə verməsi gözlənilir.
Daha çox
Biznes
kateqoriyasından
