Yaradıcılıq, texnologiya və startap sahələri üzrə gündəmdə olan xəbərləri buradan izləyə bilərsiniz. Bu günün xəbərləri ilə qarşınızdayıq, xoş oxumalar!
“mygov”da bütün sənədləri “SİMA İmza” ilə əldə etmək mümkündür
Rəqəmsal İnkişaf və Nəqliyyat Nazirliyinin tabeliyindəki “AzInTelecom” MMC tərəfindən yaradılmış SİMA yeni nəsil rəqəmsal imza ilə “mygov” mobil tətbiqinə giriş imkanı yaradılıb. Vətəndaşlar “digital.login” vahid giriş sistemi üzərindən “mygov” platformasına daxil olmaqla müxtəlif dövlət qurumları üzrə məlumatları əldə edə bilərlər.
İnnovasiya və Rəqəmsal İnkişaf Agentliyinin təqdim etdiyi “mygov” rəqəmsal hökumət platformasında iş və yaşayış yeri, ailə tərkibi, adına olan əmlaklar, diplomlar, mobil nömrələr, cərimələr, etibarnamələr və s. daxil olmaqla 40-dan çox rəqəmsal məlumat, eləcə də şəxsiyyət vəsiqəsi, nikah, doğum və ölüm haqqında şəhadətnamə kimi rəqəmsal sənədlər təqdim olunur. Vətəndaşlar bu rəqəmsal sənəd və məlumatları QR kod, yaxud PDF şəklində paylaşa bilərlər.
Tətbiq sayəsində vətəndaşlar üçün qurumlar tərəfindən fərdi məlumatların istifadəsinə nəzarət etmək imkanı da yaradılıb. Eyni zamanda ailə qurmaq, valideyn olmaq və ailə üzvünün vəfatı kimi həyat hadisələri zamanı zəruri dövlət xidmətləri “mygov” üzərindən təqdim olunur.
"Mercedes" "Sony"nin sinema xidmətini avtomobillərinə inteqrasiya edir
"Mercedes" "Sony Pictures Entertainment" ilə əməkdaşlıq nəticəsində "RIDEVU" xidməti vasitəsilə avtomobildə kinoteatr təcrübəsi təqdim edəcək. "RIDEVU" xidməti "MBUX Entertainment Package Plus" abunəsi olan istifadəçilərə təklif olunur və eyni anda altı ekranda istifadə oluna bilər.
"Samsung" və "Amazon" yeni bir cihaz üzərində işləyir
"Samsung"un "Amazon" ilə əməkdaşlığı nəticəsində "Galaxy M15 5G Prime" adlı cihaz təqdim edəcəyi iddia olunub. Telefonun 8 GB RAM tutumuna sahib olacağı qeyd olunub.
"Redmi Note 14 Pro"nun buraxılış tarixi açıqlanıb
"Xiaomi" 26 sentyabrda "Redmi Note 14 Pro" seriyasını rəsmi olaraq istifadəçilərə təqdim edəcək. "Redmi Note 14 Pro" seriyası həm IP68, həm də IP69K sertifikatına sahib olacaq. Bu o deməkdir ki, telefonlar suya, toza və yüksək temperaturlara tab gətirə bilər.
Elon Musk "X"də bloklama funksiyasının dəyişəcəyini açıqlayıb
Müvafiq olaraq, “X”də bir istifadəçini bloklasanız belə, onlar hələ də paylaşımlarınızı görə biləcəklər. Bununla belə, bloklanmış istifadəçi paylaşımlarınıza şərh yaza və ya başqa şəkildə əlaqə saxlaya bilməyəcək.
Daha çox
Daily
kateqoriyasından
