Yaradıcılıq, texnologiya və startap sahələri üzrə gündəmdə olan xəbərləri buradan izləyə bilərsiniz. Bu günün xəbərləri ilə qarşınızdayıq, xoş oxumalar!
Rəqəmsal Akademiyaya start verilib!
Rəqəmsal Akademiya çərçivəsində "Rəqəmsal Transformasiya üzrə rəhbər” proqramının başlanğıcı elan edilib. İnnovasiya və Rəqəmsal İnkişaf Agentliyi sözügedən proqramı rəqəmsal idarəetmə sahəsində böyük təcrübəyə sahib Digital Nation komandası ilə birlikdə həyata keçirməyə başlayıb. İlk hissəsi başa çatmış proqramda, dövlət qurumlarından 50-dən çox İKT rəhbəri və aparıcı nümayəndələrin fəal iştirakı qeydə alınıb.
Təcili anlarda "WhatsApp"a daxil olmağa imkan verən yeni üsul gəlir
iOS yeniləməsinin bir hissəsi olaraq "WhatsApp" istifadəçilərə e-poçt ünvanı vasitəsilə tətbiqə daxil olmağa imkan verən alternativ giriş metodunu təqdim edir. “Meta” bu günə qədər məsələ ilə bağlı rəsmi açıqlama verməyib, lakin xüsusiyyətlər “WABetaInfo” tərəfindən əvvəlcədən paylaşılıb. Bu funksiyanı sınamaq üçün iPhone istifadəçiləri iOS üçün “WhatsApp”ın 23.24.70 versiyasına sahib olmalıdırlar. Yeni funksiyanın tezliklə bütün istifadəçilər üçün əlçatan olacağı gözlənilir.
Məktəbə geri qayıdırıq? "Google Meet" danışmazdan əvvəl əlinizi qaldırmağınızı xahiş edir!
"Google Meet" zamanı əl qaldıraraq görüşdəki digər şəxsləri xəbərdar edə biləcəksiniz. Əlinizi qaldırdıqda göründüyünüz ekranın üzərinə yeni simvol əlavə olunacaq. Google bu funksiyanı bu gün bloq yazısı vasitəsilə elan edib. Təəssüf ki, bu yeni funksiyadan hər kəs faydalana bilməyəcək. Əl qaldırma jestinin aşkarlanması funksiyası yalnız seçilmiş “Google Workspace” biznes və təhsil planları üçün əlçatan olacaq. Bu funksiyanın gələcəkdə daha çox istifadəçi üçün əlçatan olub-olmayacağı hələlik bəlli deyil.
30 yaşlı "Porsche" hərraca çıxarılıb
Porsche 911 Carrera RSR modeli hərraca çıxarılıb. 1993-cü ildə istehsal olunmuş xüsusi seriyadan cəmi 2 ədədi işlək vəziyyətdədir. Metal gümüşü rəngi olan avtomobil heç vaxt təmir olunmayıb. 911 Carrera RSR noyabrın 25-də, F1 yarışlarından bir qədər əvvəl Əbu-Dabidə hərraca çıxarılacaq. Avtomobil üçün təkliflərin 2,5 milyon dollara çatacağı gözlənilir.
Sam Altmanın qoşulmasından sonra “Microsoft” səhmləri rekord səviyyəyə çatıb
Keçdiyimiz günlərdə Satya Nadella "OpenAI"yə rəhbərlik edən Altmanın, həmtəsisçi Greg Brockman ilə birlikdə yeni qabaqcıl süni intellekt tədqiqat qrupuna rəhbərlik etmək üçün “Microsoft”a qoşulacağını açıqlamışdı. Sam Altmanı işə götürdükdən sonra “Microsoft”un səhmlərində rekord artım müşahidə olunub. Noyabrın 21-də şirkətin bazar dəyəri ilin əvvəlindən 1 trilyon dollar artaraq 2,8 trilyon dolları ötüb.
Daha çox
kateqoriyasından
