Evlənmək üçün əşyalarını satdı, 1900 km yol getdi, amma sevgilisinin AI olduğunu öyrəndi.
Braziliyada yaşayan 49 yaşlı Edimar Martins evlənəcəyinə inandığı qadınla görüşmək üçün bütün əşyalarını sataraq 1900 kilometrdən çox yol qət edib. Lakin o, təyinat nöqtəsinə çatdıqda qarşılaşdığı qadın obrazının süni intellekt vasitəsilə yaradıldığını öyrənib.
Martinsin diqqətini sosial şəbəkələrdə 300 mindən çox izləyicisi olan hesabda yayımlanan videolar çəkib. Həmin videolarda Jessica Oliveira adlı qadın obrazı təqdim olunur, kişilərə isə fermada birgə yaşamaq və maliyyə dəstəyi vəd edilirdi. Bu paylaşımlara inanan Martins qadınla görüşmək ümidi ilə yola çıxıb.
Belo Horizonte şəhərində qadını tapa bilməyən Martins yerli radio stansiyasına müraciət edib və onun real insan olmadığını öyrənib. Səfərə bütün pulunu xərclədiyi üçün geri qayıtmağa imkanı qalmayıb. Nəticədə şəhərin sosial xidmətləri ona yemək və evə dönmək üçün nəqliyyat dəstəyi göstərib.
Hadisədən sonra hesabın arxasında duran şəxs qadın obrazının süni intellektlə yaradıldığını açıqlayıb. Onun sözlərinə görə, hesab izləyici cəlb etmək və kommersiya məqsədləri üçün yaradılıb. Həmin şəxs Martinslə birbaşa ünsiyyət qurmadığını və onu görüşə dəvət etmədiyini iddia edib.
Daha çox
Texnologiya
kateqoriyasından
