DYP yol hərəkətinə nəzarətdə süni intellektdən istifadə etməyə başlayıb.
Baş Dövlət Yol Polisi İdarəsi (BDYPİ) yol hərəkəti təhlükəsizliyinin təmin edilməsi üçün süni intellekt əsaslı texnologiyalardan istifadə edir. Bu sistemlər yol hərəkətini izləməyə, mümkün təhlükələri müəyyənləşdirməyə və sürət həddinin aşılması kimi qayda pozuntularını aşkarlamağa imkan verir.
İstifadə olunan videoanalitik sistemlər yol şəraitini təhlil edərək təhlükəli vəziyyətlərin əvvəlcədən müəyyənləşdirilməsinə kömək edir. Ağıllı radarlar isə nəqliyyat vasitələrinin hərəkət sürətini qeydə alır və müəyyən edilmiş sürət həddinin aşılması hallarını aşkarlayır.
Sürət pozuntusu qeydə alındıqda müvafiq məlumat məlumat mərkəzinin informasiya sisteminə ötürülür. Təqdim edilən məlumata görə, inzibati tənbeh barədə qərar bu proses çərçivəsində avtomatik qəbul edilir. Beləliklə, texnologiyadan yol hərəkəti qaydalarına nəzarətin daha operativ həyata keçirilməsi üçün istifadə olunur.
BDYPİ-nin nümayəndəsi Toğrul Quliyev bildirib ki, bu texnologiyaların tətbiqində əsas məqsəd sürücülərə daha çox cərimə yazmaq deyil, yol-nəqliyyat hadisələrinin və ölüm hallarının sayını azaltmaqdır. Onun sözlərinə görə, yol hərəkətində təhlükəsizliyin təmin olunması üçün texniki nəzarətlə yanaşı, sürücülərin və piyadaların məsuliyyətli davranışı da vacibdir.
Qurumun nümayəndəsi sürücülərə sükan arxasında mobil telefondan istifadə etməməyi, piyadalara isə yolu keçərkən diqqətli olmağı tövsiyə edib. Yol hərəkəti iştirakçılarının qaydalara əməl etməsi və diqqətli davranması qəza riskinin azaldılmasında mühüm rol oynayır.
Daha çox
Texnologiya
kateqoriyasından
