Rusiya Enteromix adlı mRNA əsaslı xərçəng peyvəndinin ilkin sınaqlarda yüksək effektivlik göstərdiyini açıqlayıb. Rəsmi məlumatlara görə, peyvənd ilkin sınaqlarda iştirak edən xəstələrdə şişlərin əhəmiyyətli dərəcədə kiçilməsi ilə müşahidə olunub və 100% effektivlik nəticəsi əldə edilib.
Xatırlatmaq lazımdır ki, peyvəndin “istifadəyə hazır” olduğu bildirilməsi onun geniş ictimai istifadəyə verildiyi mənasına gəlmir. Bu ifadə yalnız Enteromix peyvəndinin insan üzərində klinik sınaqlara başlamağa hazır olduğunu göstərir. Hazırkı mərhələdə peyvənd hələ geniş tətbiq üçün təsdiq edilməyib və onun təhlükəsizliyi, uzunmüddətli təsirləri hələ də araşdırılır.
Mütəxəssislər qeyd edirlər ki, mRNA texnologiyası xərçənglə mübarizədə böyük ümidlər vəd etsə də, peyvəndin effektivliyinin təsdiqlənməsi üçün daha geniş və uzun müddətli klinik sınaqların keçirilməsi vacibdir. Həmçinin, müxtəlif xərçəng növlərində peyvəndin nəticələri fərqli ola bilər, bu səbəbdən əlavə araşdırmaların aparılması tələb olunur.
Rəsmi açıqlamalara görə, Enteromix peyvəndinin hazırlanması və sınaqların keçirilməsi Rusiya səhiyyə orqanlarının nəzarəti altında aparılır və nəticələr yalnız elmi icma tərəfindən qiymətləndiriləndən sonra növbəti mərhələlərə keçiləcək. Bu addım xərçənglə mübarizədə potensial yeni yanaşmalar üçün əhəmiyyətli bir ilkin göstərici hesab olunur.
Daha çox
Daily
kateqoriyasından
