Azərbaycan və Qazaxıstan Xəzər üzərindən sərnişin reyslərini bərpa edir!

Azərbaycandan Qazaxıstana su yolu ilə getmək olacaq.

Azərbaycan və Qazaxıstan arasında Xəzər dənizi üzərindən sərnişin bərə reyslərinin bərpası planlaşdırılır. Söhbət Kurık limanı–Bakı limanı–Kurık limanı marşrutu üzrə sərnişin daşımalarının yenidən həyata keçirilməsindən gedir.

Qazaxıstanın Azərbaycandakı səfiri Alim Bayel bildirib ki, bu təşəbbüs Azərbaycan tərəfi tərəfindən də dəstəklənib. Hazırda iki ölkənin müvafiq nəqliyyat qurumları marşrutun bərpası ilə bağlı işlərə başlayıb.

Kurık və Bakı limanları arasında sərnişin daşımaları COVID-19 pandemiyasına qədər həyata keçirilib. Pandemiya dövründə dayandırılan reyslərdən həmin vaxtadək ildə təxminən 1 500 sərnişinin istifadə etdiyi bildirilir.

Marşrutun yenidən fəaliyyətə başlamasının Azərbaycan və Qazaxıstan arasında turizm və insanlararası əlaqələrin genişlənməsinə imkan yaradacağı gözlənilir. Sərnişin bərə xəttinin bərpası eyni zamanda Xəzər üzərindən nəqliyyat əlaqələrinin inkişafına və Orta Dəhlizin imkanlarının genişləndirilməsinə töhfə verə bilər.

Hazırda Bakı ilə Qazaxıstanın Astana, Almatı, Şımkent, Aktau və Atırau şəhərləri arasında həftədə ümumilikdə 37 aviareys həyata keçirilir. Dəniz nəqliyyatı üzrə sərnişin əlaqəsinin bərpası iki ölkə arasında mövcud nəqliyyat bağlantılarını daha da şaxələndirə bilər.

‍