Formula 1 yarışları gələcəkdə mərkəzdə yox, Sea Breeze-də keçirilə bilər!

Formula 1 Azərbaycan Qran-prisinin keçirildiyi məkan dəyişə bilər.

Formula 1 Azərbaycan Qran-prisinin gələcəkdə Bakının mərkəzindən “Sea Breeze” ərazisinə köçürülməsi ehtimalı gündəmə gəlib. “Sea Breeze”in sahibi Emin Ağalarov ərazidə Formula 1 üçün yeni trasın inşası ilə bağlı uzun müddətdir müzakirələrin aparıldığını bildirib.

Ağalarovun sözlərinə görə, layihə çərçivəsində Formula 1 traslarının layihələndirilməsi ilə məşğul olan “Tilke” şirkəti ilə də əlaqə saxlanılır. Hazırda isə “Sea Breeze”də yarışın keçirilməsi ilə bağlı konkret razılaşma yoxdur.

O qeyd edib ki, tras və yarışların keçirilməsi üçün lazım olan digər infrastrukturun 2030–2031-ci illərə qədər inşa edilməsi mümkün olsa, Formula 1 yarışlarının nəzəri olaraq “Sea Breeze” ərazisində keçirilməsi gündəmə gələ bilər.

Bu halda Azərbaycan Qran-prisinin hazırda istifadə olunan Bakı Şəhər Halqası əvəzinə yeni trasda keçirilməsi mümkün olacaq. Lakin bunun reallaşması üçün ilk növbədə layihənin hazırlanması, infrastrukturun qurulması və Formula 1 tərəfi ilə müvafiq razılaşmaların əldə olunması tələb olunur.

Ağalarov paylaşımında Formula 1 yarışlarının “Sea Breeze”də keçirilməsi halında ərazinin necə görünə biləcəyini göstərən vizual video da yayımlayıb. Hazırda bu görüntülər mümkün layihənin təqdimatı xarakteri daşıyır və yeni trasın tikintisi ilə bağlı yekun qərarın verildiyi anlamına gəlmir.

‍