Azərbaycana sürücüsüz nəqliyyat gəlir - Qanunlarda dəyişiklik müzakirəyə çıxarılıb

Azərbaycanda avtonom nəqliyyat vasitələri üçün hüquqi çərçivə genişləndirilir.

Azərbaycanda avtomobil, dəmir yolu, metro, tramvay, dəniz və hava nəqliyyatı daxil olmaqla bütün əsas nəqliyyat sahələrində sürücüsüz və avtonom idarəetmə sistemlərinin tətbiqinə hüquqi zəmin yaradılması istiqamətində qanunvericiliyə dəyişikliklər hazırlanır. Layihə Milli Məclisdə müzakirəyə çıxarılıb.

Dəyişikliklər “Yol hərəkəti haqqında”, “Nəqliyyat haqqında”, “Aviasiya haqqında” və digər əlaqəli qanunvericilik aktlarını əhatə edir. Yeni yanaşma avtonom texnologiyaların ölkə daxilində təhlükəsiz və tənzimlənmiş şəkildə tətbiqi üçün hüquqi, texnoloji və institusional mexanizmlərin formalaşdırılmasını nəzərdə tutur.

Layihəyə əsasən, qanunvericiliyə “avtonom nəqliyyat vasitəsi”, “operator” və “məsafədən idarəetmə mərkəzi” kimi yeni anlayışların daxil edilməsi planlaşdırılır. Bu terminlər vasitəsilə həm texniki idarəetmə, həm də məsuliyyət mexanizmlərinin daha aydın şəkildə müəyyənləşdirilməsi hədəflənir.

Sənəd Prezident tərəfindən təsdiqlənmiş 2026–2028-ci illəri əhatə edən Rəqəmsal İnkişaf Planı çərçivəsində hazırlanıb. Yeni qaydalara əsasən, avtonom nəqliyyat vasitələrinin istismarı yalnız dövlət qeydiyyatından sonra və səlahiyyətli qurumların müəyyən etdiyi xüsusi ərazilərdə həyata keçirilə biləcək.

Ekspertlər bu addımı rəqəmsal nəqliyyat ekosisteminin formalaşdırılması, şəhər mobilliyinin modernləşdirilməsi və gələcəkdə smart nəqliyyat infrastrukturuna keçid baxımından mühüm mərhələ kimi qiymətləndirirlər.

‍