Azərbaycanda media üçün vahid qurum kimi Media və Yayım Şurası yaradılır!

Azərbaycanda media üçün vahid tənzimləyici qurum kimi Media və Yayım Şurası yaradılır.

Milli Məclisdə müzakirə olunan “Media haqqında” qanuna dəyişikliklər çərçivəsində ölkədə media və yayım sahəsini tənzimləyəcək yeni qurum – Media və Yayım Şurasının yaradılması təklif edilir. Layihəyə əsasən, yeni qurum hazırda fəaliyyət göstərən Medianın İnkişafı Agentliyi və Audiovizual Şura əsasında formalaşdırılacaq.

Yeni struktur media və yayım sahəsində vahid səlahiyyətli dövlət orqanı kimi fəaliyyət göstərəcək. Təklif olunan dəyişikliklər media sektorunun idarə olunması, dövlət dəstəyi mexanizmləri və audiovizual yayım sahəsində səlahiyyətlərin bir mərkəzdə cəmləşdirilməsini nəzərdə tutur.

Ümumi səlahiyyətlər

Layihəyə əsasən, Media və Yayım Şurası media subyektlərinin iqtisadi dayanıqlığının və müstəqilliyinin gücləndirilməsi istiqamətində fəaliyyət göstərəcək. Qurum həmçinin dövlət orqanları ilə media arasında əməkdaşlığın inkişafına, informasiya mübadiləsinin təkmilləşdirilməsinə və media siyasətinin koordinasiyasına nəzarət edəcək.

Jurnalistlərin peşəkar inkişafına nəzarət

Şuranın fəaliyyət istiqamətləri arasında jurnalistlərin və media mütəxəssislərinin peşə hazırlığının artırılması da yer alır. Bunun üçün əlavə təhsil proqramlarının təşkili, ixtisasartırma kursları, təlimlər, seminarlar və müxtəlif peşəkar müsabiqələrin keçirilməsi nəzərdə tutulur.

Media məzmunu və dövlət sifarişləri

Yeni qurum maarifləndirici proqramların hazırlanması və sifariş verilməsi, audiovizual məhsulların istehsalı və yayımı üzrə dövlət sifarişlərinin həyata keçirilməsi sahəsində də səlahiyyət sahibi olacaq. Bundan əlavə, cəmiyyət üçün aktual hesab olunan mövzuların işıqlandırılmasına dəstək göstərilməsi və mediada obyektiv, balanslı informasiya təqdimatının təşviqi də Şuranın fəaliyyət istiqamətlərindən biri kimi müəyyənləşdirilir.

Qanun layihəsi hazırda parlament komitələrində müzakirə olunur və qəbul ediləcəyi təqdirdə Azərbaycanda media və yayım sektorunun idarə olunması modelində mühüm institusional dəyişikliklərdən biri hesab ediləcək.

‍