BMT Baş Assambleyası Afrikanın və digər qitələrin ölçülərini daha dəqiq əks etdirən dünya xəritələrinin istifadəsini dəstəkləyib.
Qətnaməyə 164 ölkə səs verib, ABŞ isə sənədin əleyhinə çıxan yeganə ölkə olub. Məsələ əsasən geniş istifadə olunan Merkator proyeksiyası ilə bağlıdır. Bu xəritə proyeksiyasında qütblərə yaxın ərazilər olduğundan daha böyük görünür. Nəticədə Afrika ilə Qrenlandiya xəritədə bir-birinə yaxın ölçüdə təsvir olunur. Halbuki Afrikanın ərazisi Qrenlandiyadan təxminən 14 dəfə böyükdür.
Qətnamədə qitələrin və ölkələrin nisbi ölçülərini daha düzgün göstərən Equal Earth proyeksiyasına diqqət çəkilir. Bu proyeksiya xəritədə ərazilərin formasını mümkün qədər qorumaqla yanaşı, onların real ölçülərinə daha yaxın təsvir edilməsinə imkan verir.
BMT-nin dəstəklədiyi qətnamə məcburi xarakter daşımır. Bununla belə, sənəd müxtəlif ölkələrdə dövlət qurumları, təhsil müəssisələri və digər təşkilatların istifadə etdiyi dünya xəritələrinə yanaşmanın dəyişməsinə təsir göstərə bilər. Məqsəd xəritələrdə qitələrin ölçülərinin daha real şəkildə təqdim olunmasına diqqəti artırmaqdır.
Daha çox
Breaking News
kateqoriyasından
