Azərbaycanda ƏDV depozit hesabından DSMF-yə ödəniş edilməsinə imkan verən dəyişiklik müzakirə olunur.
Milli Məclisin İqtisadi siyasət, sənaye və sahibkarlıq komitəsində Vergi Məcəlləsinə təklif edilən dəyişikliklər paketində özəl sektor üçün yeni maliyyə mexanizmi nəzərdə tutulur. Layihəyə əsasən, neft-qaz sektoru istisna olmaqla özəl şirkətlərə ƏDV depozit hesablarında olan vəsaitlərin bir hissəsini Dövlət Sosial Müdafiə Fonduna (DSMF) ödənişlərin həyata keçirilməsi üçün istifadə etmək imkanı yaradılması təklif olunur.
Təklifə görə, müəssisələr ƏDV depozit hesablarında toplanmış vəsaitləri yalnız əlavə dəyər vergisi üzrə hesablaşmalar üçün deyil, eyni zamanda işçilərin sosial sığorta ödənişlərinin maliyyələşdirilməsi məqsədilə də yönəldə biləcəklər. Dəyişikliyin biznesin dövriyyə vəsaitlərinin idarə edilməsini asanlaşdıracağı və ödənişlərin daha çevik həyata keçirilməsinə şərait yaradacağı gözlənilir.
Vergi Məcəlləsinə edilən dəyişiklik layihəsində qeyd olunur ki, bu mexanizmin 2027-ci il yanvarın 1-dən etibarən 4 il müddətində tətbiqi nəzərdə tutulur. Yeni qaydanın tətbiqi və ƏDV depozit hesablarından DSMF-yə köçürmələrin həyata keçirilməsi prosedurları isə müvafiq icra hakimiyyəti orqanının müəyyən etdiyi qaydalar əsasında tənzimlənəcək.
Layihə hazırda parlamentdə müzakirə mərhələsindədir və dəyişikliklərin qüvvəyə minməsi üçün Milli Məclis tərəfindən qəbul olunması, daha sonra isə qanunvericilik prosedurlarının tamamlanması tələb olunur.
Daha çox
Breaking News
kateqoriyasından
