Higgsfield AI tarixinin ən böyük AI film müsabiqəsini elan etdi.
Higgsfield süni intellektlə film istehsalına həsr olunan ən böyük beynəlxalq müsabiqələrdən birinə start verib. Şirkət müsabiqə üçün ümumilikdə 1 milyon dollar pul mükafatı və təxminən 10 milyon dollar dəyərində Seedance AI 4K kreditləri ayırdığını açıqlayıb. Birinci yerin qalibi 500 min dollar qazanacaq, ümumilikdə isə 14 qalib müxtəlif mükafatlarla təltif olunacaq.
Müsabiqə iştirakçılarına Higgsfield-in Seedance 2.0 4K video generasiya modelindən istifadə etməklə yüksək keyfiyyətli AI filmləri hazırlamaq imkanı yaradılır. Şirkət layihə çərçivəsində yaradıcıların istifadəsi üçün milyonlarla dollar dəyərində GPU hesablama resursunu ödənişsiz təqdim edəcəyini bildirib. Məqsəd süni intellekt vasitəsilə peşəkar səviyyədə qısametrajlı filmlərin hazırlanmasını təşviq etməkdir.
Müraciət prosesi avqustun 7-dən başlayacaq. Müsabiqədə dünyanın istənilən ölkəsindən 18 yaş və yuxarı şəxslər, həmçinin maksimum 4 nəfərdən ibarət komandalar iştirak edə biləcək. İştirak üçün aktiv Higgsfield abunəliyinin olması tələb olunur.
Şirkət hesab edir ki, bu təşəbbüs AI rejissorları, vizual hekayəçilər və rəqəmsal kontent yaradıcıları üçün yeni imkanlar açacaq. Son illərdə generativ süni intellekt alətlərinin sürətli inkişafı fonunda AI ilə hazırlanan filmlərə marağın artması belə müsabiqələrin sayının da çoxalmasına səbəb olur.
Daha çox
Yaradıcılıq
kateqoriyasından
