Azərbaycanda Çin şirkətinin ilk günəş enerji layihəsi istifadəyə verildi.
Qaradağ rayonunda Çinin “Universal Energy” şirkətinin Azərbaycanda həyata keçirdiyi ilk layihə olan 100 MVt gücündə “Qobustan” Günəş Elektrik Stansiyası istifadəyə verilib. Stansiya həmçinin Azərbaycanda hərrac mexanizmi əsasında reallaşdırılan ilk günəş elektrik stansiyası kimi təqdim olunur.
“Universal Energy” layihə üzrə keçirilən hərracın qalibi 2024-cü ildə elan olunub. Bundan sonra layihənin icrası istiqamətində işlər aparılıb və Qaradağ rayonunda günəş elektrik stansiyası qurulub.
Stansiyada günəş panelləri ilə yanaşı, invertorlar və transformatorlar da quraşdırılıb. Layihənin tam gücü ilə fəaliyyət göstərməsi nəticəsində ildə təxminən 200 milyon kilovat-saat elektrik enerjisinin istehsal olunacağı gözlənilir.
İstehsal olunacaq elektrik enerjisi hesabına hər il təxminən 45 milyon kubmetr təbii qaza qənaət edilməsi nəzərdə tutulur. Eyni zamanda layihənin atmosferə atılan karbon emissiyalarının illik 97 min ton azalmasına imkan verəcəyi bildirilir.
“Qobustan” Günəş Elektrik Stansiyasının istifadəyə verilməsi Azərbaycanın bərpa olunan enerji layihələri arasında yeni mərhələ kimi qeyd olunur. Layihə həmçinin Çin şirkətinin ölkənin yaşıl enerji sektorunda həyata keçirdiyi ilk layihə olması ilə diqqət çəkir.
Daha çox
Breaking News
kateqoriyasından
