Milli Məclisin deputatı Kamal Cəfərov parlamentdə çıxışı zamanı ölkədə 500 mindən çox sənədsiz evin mövcud olduğunu bildirərək bu problem üçün xüsusi amnistiya mexanizminin hazırlanmasını təklif edib.
Deputatın sözlərinə görə, mülkiyyət sənədi olmayan evlərdə yaşayan vətəndaşlar bir sıra hüquqi və iqtisadi məhdudiyyətlərlə üzləşirlər. Belə evlərdə qeydiyyat məsələləri, vərəsəlik hüququnun rəsmiləşdirilməsi, bank kreditlərinin əldə olunması və daşınmaz əmlakın girov kimi istifadə edilməsi kimi proseslər çətinləşir. Eyni zamanda, bu tip evlər bazarda rəsmi sənədli daşınmaz əmlaklarla müqayisədə daha aşağı qiymətlə satılır.
Kamal Cəfərov çıxışında Türkiyədə bir neçə il əvvəl tətbiq olunan “İmar Barışı” proqramını nümunə göstərib. Həmin proqram müəyyən şərtlər daxilində sənədsiz tikililərin qeydiyyata alınmasına və onların hüquqi status qazanmasına imkan yaratmışdı. Deputat hesab edir ki, oxşar yanaşma Azərbaycanda da tətbiq oluna bilər.
Təklifə görə, riskli zonalarda, dövlət ehtiyacları üçün nəzərdə tutulmuş ərazilərdə və ya hüquqi mübahisə predmetinə çevrilmiş torpaqlarda yerləşən tikililər istisna olmaqla, digər sənədsiz yaşayış evlərinin mərhələli şəkildə rəsmiləşdirilməsi mümkün ola bilər.
Deputatın fikrincə, belə bir addım təkcə vətəndaşların mülkiyyət hüquqlarının təmin olunmasına deyil, həm də daşınmaz əmlak bazarının şəffaflaşmasına, vergi bazasının genişlənməsinə və dövlət büdcəsinə əlavə gəlirlərin formalaşmasına töhfə verə bilər. Hazırda məsələ təklif səviyyəsindədir və bununla bağlı hər hansı qanunvericilik dəyişikliyi qəbul edilməyib.
Daha çox
Breaking News
kateqoriyasından
