OpenAI-ın mobil texnologiya sahəsinə daxil ola biləcəyi ilə bağlı yeni iddialar ortaya çıxıb.
Məlumatlara görə, şirkət MediaTek, Qualcomm və Luxshare ilə birlikdə yeni nəsil smartfon üzərində işləyə bilər.
Bu barədə analitik Ming-Chi Kuo bildirib ki, hazırlanan cihaz ənənəvi tətbiq (app) modelindən fərqli olaraq AI agentlərə əsaslanan sistem üzərində qurula bilər. Yəni istifadəçilər ayrı-ayrı tətbiqlərdən istifadə etmək əvəzinə, gündəlik tapşırıqları birbaşa süni intellekt vasitəsilə yerinə yetirəcək – mesajlaşma, planlama, məlumat axtarışı və digər funksiyalar vahid interfeys üzərindən idarə olunacaq.
Bu yanaşma hazırkı smartfon ekosistemlərindən əhəmiyyətli dərəcədə fərqlənir. Hazırda Apple və Google kimi şirkətlərin platformaları əsasən tətbiq əsaslı model üzərində qurulub. Yeni konsept isə daha inteqrasiya olunmuş və AI mərkəzli istifadə təcrübəsi yaratmağı hədəfləyir.
İddialara görə, bu layihə hələ ilkin mərhələdədir və istehsalın 2028-ci ildən tez başlaması gözlənilmir. Bununla belə, belə bir cihazın reallaşması mobil texnologiya bazarında ciddi dəyişikliklərə səbəb ola bilər və tətbiq əsaslı modellərin gələcəyi ilə bağlı yeni müzakirələr aça bilər.
Daha çox
Texnologiya
kateqoriyasından
