Sosial media platformalarının rəhbərləri asılılıq iddiasına görə ifadə veriblər!

Kaliforniya ştatında yaşayan 20 yaşlı Kaley G.M. sosial media platformalarının uşaq və yeniyetmələr üzərində mənfi təsirlərini əsas gətirərək məhkəməyə müraciət edib.

‍O, Instagram, YouTube və digər tətbiqlərin gəncləri “asılı” etmək üçün bilərəkdən dizayn edildiyini iddia edir. Məhkəmə prosesində Meta CEO-su Mark Zuckerberg də ifadə verib. Bu, sosial media platformalarının gənclərin psixi sağlamlığına təsiri ilə bağlı ilk genişmiqyaslı hüquqi sınaqdır və gələcəkdə oxşar iddialara hüquqi presedent yarada bilər.

Meta–nın baş direktoru Mark Zuckerberg məhkəmədə bildirib ki, vəkillər daxili sənədləri “səhv təqdim edir” və şirkət uşaqları məqsədli şəkildə hədəf almayıb. Yeniyetmələr isə şirkətin reklam gəlirlərinin 1%-dən azını təşkil edir. 

‍Instagram CEO-su Adam Mosseri artıq məhkəmədə ifadə verib və sosial medianın “klinik asılılıq” deyil, “problemli istifadə” olduğunu müdafiə edib.

YouTube CEO‑su Neal Mohan-ın əvvəl məhkəmədə ifadə verməli olduğu bildirilirdi, lakin məhkəmə tərəfi onun əvəzinə başqa YouTube rəhbərinin dindirilməsi planlaşdırıldığını açıqlayıb.

Şikayətdə adı çəkilən TikTok və Snapchat, məhkəmə başlamazdan əvvəl iddiaçı ilə məxfi razılaşma əldə ediblər.

‍