Yeni Twitter AI ilə AI-a nəzarət edəcək
Twitter.now adlı yeni sosial şəbəkə fəaliyyətə başlayıb. Platforma Twitter-in keçmiş hüquq məsləhətçisi Stephen Coatesun da daxil olduğu Operation Bluebird startapı tərəfindən yaradılıb. Yeni platformanın əsas fərqi paylaşımların etibarlılığını süni intellekt vasitəsilə qiymətləndirməyə çalışmasıdır.
Platformanın istifadəyə verilməsindən əvvəl X şirkəti Operation Bluebird-ə qarşı məhkəməyə müraciət edərək “Twitter” adından istifadənin qarşısını almağa çalışıb. Startap isə X-in “Twitter” və “Tweet” ticarət nişanlarından artıq imtina etdiyini iddia edib. Bu səbəbdən platformanın adı və brendinqi ətrafında hüquqi mübahisə də yaranıb.
Twitter.now-da paylaşılan məlumatların yoxlanılması üçün VERA adlı AI sistemi istifadə olunur. Sistem müxtəlif iddiaları təhlil edərək onların mümkün doğruluğunu qiymətləndirməyə, mənbələri və əlavə konteksti göstərməyə çalışır. Paylaşımlara həmçinin etibar balı verilir ki, istifadəçilər məlumatın nə dərəcədə etibarlı olduğu barədə daha aydın təsəvvür əldə etsinlər.
Platformanın gələcək funksiyalarından biri isə istifadəçilərə şəxsi etibar həddi müəyyənləşdirmək imkanı verməkdir. Bu halda müəyyən baldan aşağı qiymətləndirilən paylaşımlar istifadəçinin lentindən avtomatik çıxarıla bilər.
Twitter.now bu yanaşma ilə sosial şəbəkələrdə yanlış məlumatların yayılmasını azaltmağı və istifadəçilərə xəbər lentləri üzərində daha çox nəzarət verməyi hədəfləyir. Bununla yanaşı, AI tərəfindən verilən etibar ballarının nə dərəcədə dəqiq və qərəzsiz olacağı platformanın qarşısında duran əsas suallardan biri olaraq qalır.
Daha çox
Texnologiya
kateqoriyasından
