WhatsApp istifadəçi adı funksiyasını istifadəyə verməyə başlayıb
WhatsApp uzun müddətdir gözlənilən istifadəçi adı (username) funksiyasını mərhələli şəkildə istifadəyə verməyə başlayıb. Yeni yenilik sayəsində istifadəçilər artıq telefon nömrələrini paylaşmadan, yalnız seçdikləri istifadəçi adı vasitəsilə digər şəxslərlə əlaqə saxlaya biləcəklər. Şirkətin məlumatına görə, funksiya bütün istifadəçilər üçün mərhələli şəkildə təqdim olunacaq və ilin sonuna qədər qlobal miqyasda əlçatan olması planlaşdırılır.
Yeni sistemdə hər istifadəçi özünə unikal username təyin edə biləcək. Başqa şəxslər həmin istifadəçi adını bildikləri halda istifadəçini tapa və onunla söhbət başlada biləcəklər. Bununla yanaşı, hesabın yaradılması və təhlükəsizlik məqsədləri üçün telefon nömrəsindən istifadə tələbi qüvvədə qalacaq.
WhatsApp bildirib ki, username-lər açıq axtarış sistemində görünməyəcək və istifadəçilər təsadüfi şəkildə tapıla bilməyəcəklər. Bu yanaşma şəxsi məlumatların qorunmasını gücləndirməyə və telefon nömrəsinin üçüncü şəxslərlə paylaşılması zərurətini azaltmağa hesablanıb. İstifadəçilər istənilən vaxt istifadəçi adlarını dəyişdirə, həmçinin bu funksiyanı deaktiv edərək əvvəlki qaydada yalnız telefon nömrəsi ilə əlaqə saxlanılmasına üstünlük verə biləcəklər.
Yeni funksiya xüsusilə işgüzar əlaqələr, onlayn icmalar və tanımadığı şəxslərlə ünsiyyət zamanı məxfiliyin artırılması baxımından WhatsApp-ın son illərdə təqdim etdiyi ən əhəmiyyətli yeniliklərdən biri hesab olunur.
Daha çox
Texnologiya
kateqoriyasından
