Xəzər artıq təkcə enerji deyil, internet məlumatlarını da daşıyacaq.
Azərbaycan və Qazaxıstan arasında Xəzər dənizinin dibi ilə çəkilən 380 kilometrlik ilk sualtı fiber-optik kabel xətti uğurla tamamlanıb. Layihə Rəqəmsal İpək Yolu (Digital Silk Way) təşəbbüsü çərçivəsində AzerTelecom və Kazakhtelecom şirkətləri tərəfindən həyata keçirilir və regionun rəqəmsal bağlantısının gücləndirilməsi baxımından strateji əhəmiyyət daşıyır.
Hazırda kabelin sahilyanı infrastruktur və məlumat ötürmə şəbəkələri ilə inteqrasiyası üzrə işlər davam edir. Layihənin 2026-cı ilin sonunadək tam istifadəyə verilməsi planlaşdırılır. Yeni xəttin saniyədə 400 Tbit/s-dən çox məlumat ötürmə qabiliyyətinə malik olacağı bildirilir ki, bu da regionun ən yüksək tutumlu beynəlxalq internet bağlantılarından biri olacaq.
Yeni sualtı kabel Avropa və Asiya arasında alternativ rəqəmsal dəhliz formalaşdıraraq internet trafikinin daha sürətli, dayanıqlı və etibarlı şəkildə ötürülməsinə imkan verəcək. Bu infrastrukturun həm beynəlxalq telekommunikasiya operatorları, həm də bulud xidmətləri, məlumat mərkəzləri və rəqəmsal platformalar üçün yeni imkanlar yaradacağı gözlənilir.
Mütəxəssislərin fikrincə, layihə Azərbaycanın regional rəqəmsal tranzit mərkəzi kimi mövqeyini daha da gücləndirə, ölkənin beynəlxalq məlumat axınındakı rolunu artıra və regionda rəqəmsal iqtisadiyyatın inkişafına əlavə töhfə verə bilər. Xəzər dənizi beləliklə, enerji resursları ilə yanaşı, yüksək sürətli məlumat ötürülməsində də mühüm strateji marşrutlardan birinə çevrilir.
Daha çox
Texnologiya
kateqoriyasından
