Yaradıcılıq, texnologiya və startap sahələri üzrə gündəmdə olan xəbərləri buradan izləyə bilərsiniz. Bu günün xəbərləri ilə qarşınızdayıq, xoş oxumalar!
Bakı qlobal startap ekosistemi reytinqində 68 pillə irəliləyib
Mayın 30-da dünyanın qlobal startap ekosistem xəritəsi və araşdırma mərkəzi olan “StartupBlink” təşkilatı “Qlobal startap ekosistemi indeksi”nin 2024-cü il üzrə hesabatının təqdimat konfransı keçirilib.
Tədbirdə Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin nümayəndəsi tərəfindən ölkəmizdə özəl sektora dəstək, “INNOLAND” İnkubasiya və Akselerasiya Mərkəzi tərəfindən bu istiqamətdə həyata keçirilən tədbirlər, hədəflər və yeniliklər diqqətə çatdırılıb.
Hesabatda dünya üzrə startapların inkişafı üçün münbit şəraitin olduğu 100 ölkə və 1000 şəhər seçilib. Ötən illə müqayisədə Azərbaycan reytinqdə 4 pillə irəliləyərək top 80-liyə daxil olub. Bakı isə şəhərlərarası reytinqdə 68 pillə irəliləyərək ən yüksək nəticə göstərmiş 350 şəhərdən biri olub. Bu barədə AZƏRTAC-a Agentliyin ictimaiyyətlə əlaqələr şöbəsindən məlumat verilib. Bildirilib ki, reytinq hesablanarkən şəhərlərdə innovasiya mərkəzlərinin, investorların, qeydə alınmış startapların və akselerasiya proqramlarının sayı, o cümlədən startaplar üçün yaradılmış infrastruktur və onlardan istifadə, güzəşt mexanizmləri, universitetlərdə innovasiya tədbirləri, startap bazar həcmi, tədqiqat və araşdırma işləri kimi meyarlar nəzərə alınır. Xatırladaq ki, Dövlət Agentliyi 2022-ci ildən etibarən “StartupBlink” təşkilatının ölkə üzrə əsas tərəfdaşdır.
Azərbaycanın beynəlxalq reytinqlərdə daha da irəliləməsi üçün yerli innovasiya ekosisteminə dair yeniliklər, reallaşan layihələr və dəstək tədbirləri ilə bağlı məlumatların beynəlxalq arenada paylaşılması istiqamətində işlər davam etdirilir.
iOS 18-in AI xüsusiyyətləri sadəcə yeni modellərə özəl ola bilər
Mark Qurmanın iddiasına görə, iOS 18 əməliyyat sistemi ilə mövcud olacaq süni intellekt xüsusiyyətləri iPhone 15 Pro və sonrakı modellər üçün özəl olacaq.
Logitech Mac yeni məhsullarını təqdim edib
Logitech Mac cihazları üçün hazırlanmış yeni məhsullarını təqdim edib. Bu məhsullara erqonomik klaviatura və siçanlar daxildir.
MX Keys S arxa işıqlı düymələri olan klaviatura kimi görünür. Bu klaviaturada Logi Options+ funksiyası da var, yəni biz klaviatura vasitəsilə “ağıllı hərəkətlər” kimi təyin olunan əməliyyatları yerinə yetirə bilərik. MX Keys S eyni vaxtda 3 fərqli Apple cihazına qoşulur və cihazlar arasında rahat keçid təmin edir.
MX Keys Combo klaviaturaya əlavə olaraq MX Master 3S siçanı daxildir. Səssiz klik funksiyasına sahib olan siçanın 8K DPI sensoru da var. Siçanın MagSpeed Elektromaqnit təkəri sayəsində daha sürətli və daha kəskin sürüşmə əldə edilə bilər. Həm klaviatura, həm də siçan Logi Options+ proqramı vasitəsilə fərdiləşdirilə bilər. Logitech-dən başqa bir Mac klaviaturası olan MX Keys Mini minimalist dizaynı ilə seçilir. Ağıllı işıqlandırma və proqram təminatının fərdiləşdirilməsi seçimlərinə malik olan klaviatura tətbiqlər üçün xüsusi qısa yollar və profillər yaratmaq imkanına da malikdir.
Son təqdim olunan məhsul, Ergo Wave Keys klaviaturası, Logitech-in Mac üçün xüsusi olaraq hazırlanmış ilk erqonomik klaviaturasıdır. Əl dayaqları ilə seçilən klaviaturanın daha yaxşı duruş təmin etdiyi və biləklərdəki yükü azalddığı bildirilir.
Pulqabını tez-tez itirirsinizsə, bu kart sizə görədir
"Nomad" yeni məhsulu olan izləmə kartını təqdim edib. Bu kartı pulqabınıza yerləştirərək iPhone vasitəsilə pulqabınızı itirdiyiniz zaman onu asanlıqla tapa bilərsiniz.
İzləmə Kartı təxminən iki kredit kartının qalınlığındadır. Ona görə də pul kisəsi üçün çox yer tutmur. Bundan əlavə, kredit kartı ölçüsündə olduğu üçün digər kartlarla da daşına bilər. Hazırda bazarda bir neçə Find My kartları var və "Nomad"dan kartı 2 mm-də mövcud olan ən nazik kartlardan biridir.
Elon Musk nəhayət SEC-ə ifadə verməyi qəbul edib
Elon Musk 2022-ci ildə Twitter səhmlərini alması ilə bağlı ifadə verməkdən imtina etdiyi üçün ABŞ Qiymətli Kağızlar və Birja Komissiyası (SEC) tərəfindən məhkəməyə verilmişdi. SEC-in verdiyi açıqlamaya görə, Musk sentyabrın 15-də ifadə verməyə getməli idi, lakin o, bunu ləğv edib. Planlaşdırılan ifadəsindən 2 gün əvvəl vəkilləri vasitəsilə ifadə verməyə gəlməyəcəyini açıqlayan Musk ləğv qərarı üçün San Fransiskonu uyğun bir ifadə yeri olaraq görmədiyini bildirib. ABŞ-nin Qiymətli Kağızlar və Birja Komissiyası Musk-ın yaşadığı yerə daha yaxın olan Texas ştatının Fort-Uort şəhərində ifadə verməsini təklif edib, lakin bu tələb də qarşılıqsız olub. Musk nəhayət bu qərarından geri dönərək SEC-in Twitter araşdırmasında ifadə verməyə razı oldu. Musk-ın 2022-ci ildə Twitter səhmlərini almaqla qiymətli kağızlar qanunlarını pozduğu iddia edilir. Twitter-i aldıqdan sonra onu X-ə çevirən Musk sahibi olduğu şirkətlər vasitəsilə gündəmdə qalmağa davam edir.
Daha çox
Daily
kateqoriyasından
