ChatGPT bizneslərə platformada özlərini tanıtmaq imkanı yaradır
OpenAI ChatGPT-ni şirkətlərin müştərilərlə əlaqə saxlaya və məhsullarını tanıda biləcəyi platformaya çevirmək istiqamətində yeni addım atıb. Şirkət “Businesses in ChatGPT” adlı beta funksiyasını təqdim edib. Yenilik bizneslərə platformada öz profillərini təsdiqləmək, məlumatlarını idarə etmək və istifadəçilərin şirkətlərlə necə əlaqə qurduğunu izləmək imkanı verir.
Şirkətlər yeni Business Hub vasitəsilə ChatGPT-də öz biznes profillərini təsdiqləyə, məhsul və xidmətləri haqqında məlumatları yeniləyə biləcəklər. Pərakəndə satışla məşğul olan bizneslər qiymət və məhsulun mövcudluğu barədə məlumatları da sistemə əlavə edə biləcəklər. Bu məlumatlar istifadəçilərin məhsul və xidmətlərlə bağlı suallarına daha dəqiq cavab verilməsi üçün istifadə olunacaq.
Yeniliyin digər əsas hissəsi Business Agent alətidir. Bu funksiya şirkətlərə öz süni intellekt agentlərini yaratmaq, sınaqdan keçirmək və istifadəyə vermək imkanı yaradır. Agent müştərilərin suallarını cavablandıra, məhsul və xidmətləri müqayisə etməyə kömək edə, istifadəçiləri seçim və alış prosesində istiqamətləndirə bilər. Bu söhbətlər ChatGPT-nin adi cavablarından ayrı və xüsusi olaraq biznes agenti ilə aparılan dialoq kimi işarələnəcək.
Business Hub şirkətlərə analitika imkanları da təqdim edir. Biznes sahibləri ChatGPT cavablarında şirkətlərinin neçə dəfə qeyd olunduğunu, veb-saytlarına neçə klik edildiyini və hansı mövzular üzrə istifadəçilərin onları tapdığını görə biləcəklər. Bununla belə, OpenAI fərdi istifadəçilərin söhbətlərini və Business Agent ilə yazışmalarını şirkətlərlə paylaşmayacağını bildirir. Statistik məlumatlar ümumiləşdirilmiş formada təqdim ediləcək.
Shopify mağazaları Business Hub və ya Shopify idarəetmə paneli vasitəsilə öz mağazalarını ChatGPT-yə qoşa biləcəklər. Shopify-dan istifadə etməyən şirkətlər də platformada ayrıca qeydiyyatdan keçərək biznes profillərini təsdiqləyə biləcəklər.
Daha çox
Texnologiya
kateqoriyasından
