Əməkhaqqının gizlədilməsi və müqavilədəkindən az ödənilməsi elektron sistemlə aşkarlanacaq
Azərbaycanda əməkhaqqının gizlədilməsi, işçilərə müqavilədə göstəriləndən az məbləğ ödənilməsi və maaşların gecikdirilməsi hallarının qarşısını almaq üçün yeni elektron mexanizmin hazırlanması nəzərdə tutulur. Yeni sistem əmək müqavilələrində qeyd olunan əməkhaqqı ilə işçilərin hesablarına faktiki köçürülən məbləğləri müqayisə etməyə imkan verəcək.
Əmək və əhalinin sosial müdafiəsi nazirinin müavini Zaur Əliyevin sözlərinə görə, yeni mexanizm çərçivəsində əməkhaqqı və digər ödənişlər nazirliyin elektron sistemindən banklara ötürülən məlumatlar əsasında həyata keçiriləcək. İşçilər isə maaşlarının köçürülməsi üçün bank hesabını özləri seçə biləcəklər. Beləliklə, əməkhaqqı ödənişlərinin daha şəffaf və izlənilə bilən mexanizm üzərindən aparılması planlaşdırılır.
Sistem vasitəsilə əmək müqaviləsində göstərilən məbləğlə faktiki ödəniş arasında fərq yaranarsa, bu uyğunsuzluğun müəyyən edilməsi mümkün olacaq. Eyni zamanda, əməkhaqqının gecikdirilməsi və digər ödənişlərin düzgün aparılmaması hallarına nəzarətin gücləndirilməsi hədəflənir.
Yeni mexanizm işçilər üçün də əlavə imkanlar yaradacaq. Onlar elektron sistem vasitəsilə əməkhaqqı tarixçələrinə, maaşlarından edilən tutulmalara və digər ödənişlərə dair məlumatları əldə edə biləcəklər. Bundan başqa, məzuniyyət, ezamiyyət və xəstəlik hallarında orta əməkhaqqının avtomatik hesablanması nəzərdə tutulur.
Dəyişikliklərin işəgötürənlər üçün də prosedurları sadələşdirməsi gözlənilir. Məlumatların elektron sistem üzərindən ötürülməsi əməkhaqqı hesablamaları və müvafiq hesabatların hazırlanması ilə bağlı inzibati yükü azalda bilər.
Daha çox
Breaking News
kateqoriyasından
