Epic Games Azərbaycanda ƏDV məqsədləri üçün rəsmi vergi uçotuna alınıb.
Bu dəyişiklikdən sonra istifadəçilər platformada gördükləri qiyməti son qiymət kimi ödəyəcəklər və bank kartlarından əlavə 18% ƏDV tutulmayacaq. Şirkət vergi qeydiyyatını İsveçrədə fəaliyyət göstərən Epic Games Commerce GmbH vasitəsilə həyata keçirib. Bu model xarici rəqəmsal xidmət təminatçılarının Azərbaycan istifadəçilərinə təqdim etdikləri xidmətlər üzrə vergi öhdəliklərini yerinə yetirməsinə imkan yaradır.
Yeni qayda xüsusilə oyun, oyun əlavələri, virtual əşyalar və digər rəqəmsal məzmun alan istifadəçilər üçün qiymətlərin daha şəffaf görünməsini təmin edəcək. Beləliklə, alış zamanı əlavə vergi məbləğinin sonradan hesablanması halları aradan qalxacaq.
Məlumata görə, son dövrdə Azərbaycanda vergi uçotuna alınan xarici şirkətlər sırasına Contabo GmbH və Chess.com LLC da qoşulub. Bu tendensiya rəqəmsal xidmət bazarında fəaliyyət göstərən beynəlxalq platformaların yerli vergi tələblərinə uyğunlaşmasının davam etdiyini göstərir.
Geymerlər arasında əsas müzakirə mövzularından biri isə hazırda Steam platformasının sahibi olan Valve Corporation-ın da oxşar addım atıb-atmayacağıdır. Əgər bu baş verərsə, Steam üzərindən edilən alışlarda da qiymətlərin daha aydın və yekun formada göstərilməsi mümkün ola bilər.
Daha çox
Gaming
kateqoriyasından
