üasir dövrdə informasiya texnologiyalarının gündəlik həyatımıza nüfuz etməsi ilə yanaşı, istifadəçilərin məxfilik və enerji sərfiyyatı ilə bağlı narahatlıqları da artmaqdadır. Bu ehtiyaclara cavab olaraq təqdim edilən Bluetooth 6.1 versiyası, həm təhlükəsizlik, həm də səmərəlilik baxımından mühüm yeniliklərlə seçilir. Bu versiyanın əsas yeniliyi Təsadüfi RPA Yeniləmələri (Randomized RPA Updates) adlanan texnologiyadır.
Bu texnologiya nə vəd edir?
Yeni texnologiya Bluetooth qurğularının şəbəkədə tanınması üçün istifadə olunan Çözülə bilən Özəl Ünvanların (Resolvable Private Address – RPA) dəyişmə zamanını təsadüfi əsasla tənzimləyir. Əvvəlki versiyalarda bu ünvanların dəyişməsi müəyyən edilmiş vaxt intervallarında həyata keçirilirdisə, Bluetooth 6.1 bu prosesi tam təsadüfi şəkildə həyata keçirir. Bu isə üçüncü şəxslərin bir cihazı uzun müddət izləməsini əhəmiyyətli dərəcədə çətinləşdirir.
Məxfilik və təhlükəsizlik baxımından üstünlük
Təsadüfi dəyişən RPA ünvanları nəticəsində istifadəçilərin məkan üzrə izlənməsi və fərdi məlumatlarının toplanması riski azalır. Bu xüsusilə ictimai yerlərdə və böyük texnologiya platformalarının geniş istifadə olunduğu məkanlarda ciddi əhəmiyyət daşıyır. Bluetooth 6.1 vasitəsilə daha təhlükəsiz və məxfi əlaqə mühiti təmin olunur.
Enerji sərfiyyatında qənaət və səmərəlilik
Texnologiyanın digər üstünlüyü isə onun enerji baxımından daha qənaətli olmasıdır. Əvvəllər RPA ünvanlarının dəyişməsi əsas prosessor – CPU tərəfindən həyata keçirilirdisə, bu proses artıq daha az enerji sərf edən idarəedici modul – Kontrolçü tərəfindən icra edilir. Bu dəyişiklik nəticəsində cihazlar daha az enerji sərf edir və batareya ömrü uzanır.
