DOF Robotics Türkiyədə yeni nəsil robot texnologiyalarının istehsalı üçün böyük investisiya layihəsinə start verir.
Şirkət İstanbulda “DOF TECH” adlanan yeni istehsal və tədqiqat kompleksinin tikintisini planlaşdırdığını açıqlayıb. Layihənin ümumi investisiya dəyərinin təxminən 25 milyon dollar olacağı bildirilir. Yeni müəssisə istifadəyə verildikdən sonra şirkətin ümumi istehsal sahəsi 16 min kvadratmetrə çatacaq. DOF Robotics bu investisiya ilə istehsal gücünü təxminən dörd dəfə artırmağı və beynəlxalq bazarlardakı fəaliyyətini genişləndirməyi hədəfləyir.
Şirkətin açıqlamasına görə, DOF TECH Türkiyədə xidmət robotları və humanoid robotların hazırlanması və istehsalına fokuslanan ilk iri müəssisələrdən biri olacaq. Kompleksdə süni intellekt tədqiqatları, proqram təminatı inkişafı, Ar-Ge fəaliyyətləri, mexaniki emal, elektronika istehsalı, montaj və sınaq prosesləri vahid məkanda həyata keçiriləcək.
Layihənin ilk mərhələsində humanoid robot prototiplərinin hazırlanması nəzərdə tutulur. Daha sonra isə uğurlu sınaqlardan keçən modellərin seriyalı istehsalına başlanılması planlaşdırılır. Şirkət hesab edir ki, humanoid robotlara tələbatın artması bu sahəni yaxın illərdə texnologiya sektorunun ən sürətlə inkişaf edən istiqamətlərindən birinə çevirəcək.
DOF Robotics bildirib ki, layihənin maliyyələşdirilməsində birja yerləşdirməsindən (IPO) əldə olunan vəsaitin bir hissəsindən istifadə ediləcək. Şirkət yeni zavodun Türkiyənin robototexnika və süni intellekt ekosisteminin inkişafına töhfə verəcəyini, eyni zamanda ölkənin yüksək texnologiyalar sahəsində istehsal imkanlarını gücləndirəcəyini vurğulayır.
Daha çox
Biznes
kateqoriyasından
