Paris yaxınlığında Dragon Ball Z temalı nəhəng əyləncə parkı tikiləcək
Fransa və Səudiyyə Ərəbistanı Paris yaxınlığında məşhur Dragon Ball Z franşizasına həsr olunmuş böyük əyləncə parkı layihəsini həyata keçirməyə hazırlaşır. Cergy-Pontoise ərazisində inşa ediləcəyi bildirilən kompleksə təxminən 6 milyard avro investisiya qoyulması və layihənin uzunmüddətli perspektivdə 22 minə yaxın iş yeri yaratması gözlənilir.
Layihənin Səudiyyənin Qiddiya qrupu tərəfindən maliyyələşdiriləcəyi və kompleksin ümumilikdə üç əyləncə parkından ibarət olacağı açıqlanıb. Parklarda Dragon Ball Z kainatından tanınan personajlar, məkanlar və süjetlər əsasında attraksionların və digər əyləncə imkanlarının yaradılması planlaşdırılır.
Tikinti işlərinin bir neçə il davam edəcəyi gözlənilir. Bununla belə, layihənin dəqiq açılış tarixi hələ açıqlanmayıb. Kompleksin Paris regionuna böyük turist axını cəlb etməsi və ərazinin əyləncə turizmi baxımından əhəmiyyətini artırması hədəflənir.
Layihənin ideyasının Fransa Prezidenti Emmanuel Macron və Səudiyyə Ərəbistanının vəliəhdi Məhəmməd bin Salmanın Dragon Ball Z-yə ortaq marağından yarandığı bildirilib. Layihə reallaşacağı təqdirdə Avropada anime və pop-mədəniyyət mövzulu ən böyük əyləncə məkanlarından birinə çevrilə bilər.
Daha çox
Biznes
kateqoriyasından
