Türkiyənin rəqəmsal ödəniş platforması Papara fəaliyyət icazəsinin ləğvi ilə bağlı qəbul edilmiş qərarın məhkəmə prosesi çərçivəsində dayandırıldığını açıqlayıb.
Şirkətin yaydığı rəsmi məlumata görə, məhkəmənin qərarı ilə tətbiq olunan məhdudiyyətlər müvəqqəti olaraq aradan qaldırılıb və bu, Papara-nın xidmətlərini yenidən işə salmasına imkan yaradıb.
Papara bildirib ki, mövcud qərardan sonra platforma üzərindən təqdim olunan xidmətlər mərhələli şəkildə bərpa olunacaq. Şirkət istifadəçilərə xidmətlərin təhlükəsiz və stabil şəkildə aktivləşdirilməsi üçün texniki və əməliyyat proseslərinin davam etdiyini qeyd edib. Bu müddət ərzində bəzi funksiyaların dərhal, digərlərinin isə müəyyən vaxtdan sonra tam istifadəyə veriləcəyi bildirilib.
Papara-nın fəaliyyət icazəsi ilə bağlı qərar tənzimləyici qurum tərəfindən qəbul edilmiş və bu, şirkətin əməliyyatlarına ciddi təsir göstərmişdi. Papara isə qərarla razılaşmayaraq məhkəməyə müraciət etmişdi. Hazırda iş üzrə hüquqi proses davam edir və məhkəmə yekun qərarını verənədək əvvəlki məhdudiyyətlərin tətbiqi dayandırılıb.
