Uber-in Getir-in çatdırılma biznesini satın alması ilə bağlı razılaşma Türkiyə Rəqabət Qurumu tərəfindən təsdiqlənib.
Sövdələşmə çərçivəsində Uber BƏƏ-nin dövlət investisiya fondu Mubadala tərəfindən idarə olunan Getir-in əsas çatdırılma fəaliyyətlərini öz nəzarətinə götürəcək. Razılaşmaya əsasən, Uber Getir-in yemək çatdırılması biznesini 335 milyon dollar qarşılığında tam şəkildə əldə edir. Bundan əlavə, şirkət market, pərakəndə satış və su çatdırılması sahələrində fəaliyyət göstərən bölmələrin 15%-lik payı üçün 100 milyon dollar ödəyəcək.
Sövdələşmənin ən diqqətçəkən hissələrindən biri isə Uber-in Türkiyə bazarı ilə bağlı götürdüyü investisiya öhdəliyidir. Rəqabət Qurumunun açıqlamasına görə, şirkət qarşıdakı dövrdə ölkəyə ümumilikdə 500 milyon dollar investisiya yatırmağı planlaşdırır. Bu investisiyaların texnoloji infrastrukturun inkişafı, mühəndislik və proqram təminatı komandalarının genişləndirilməsi, yeni iş yerlərinin yaradılması və logistika şəbəkəsinin gücləndirilməsi istiqamətlərində istifadə olunacağı gözlənilir.
Qurumun qərarında qeyd olunur ki, investisiya öhdəlikləri bazarda rəqabətin qorunması və texnologiya sektorunun inkişafına töhfə verilməsi baxımından mühüm rol oynayacaq. Uber də Türkiyəni region üçün strateji bazarlardan biri kimi gördüyünü və yerli texnologiya ekosisteminə uzunmüddətli töhfə verməyi hədəflədiyini bildirib.
Daha çox
Biznes
kateqoriyasından
