Azərbaycanlı tələbənin AI startapı Claude proqramına qəbul olundu.
Dövlət Proqramı təqaüdçüsü və “King’s College London”da Kompüter elmləri üzrə bakalavr təhsili alan Tuncay Seyidəlinin təsis etdiyi Mnemoria startapı “Claude for Startups” proqramına qəbul olunub.
“Claude for Startups” erkən mərhələdə olan startaplara texnoloji resurslardan və inkişaf imkanlarından yararlanmaq üçün dəstək təqdim edir. Mnemoria-nın proqrama seçilməsi də layihənin inkişafı üçün bu imkanlardan istifadə etməsinə şərait yaradır.
Mnemoria istifadəçinin məlumatlarını və əvvəlki qarşılıqlı əlaqələrini yadda saxlayan süni intellekt sistemi üzərində çalışır. Layihə istifadəçinin məqsədlərini, prioritetlərini və yanaşmalarını zaman ərzində izləyərək onların necə dəyişdiyini analiz etməyi hədəfləyir. Bunun əsasında sistem daha fərdiləşdirilmiş cavablar və tövsiyələr təqdim etməyə yönəlib.
Proqram çərçivəsində Mnemoria Claude API kreditləri, daha yüksək API limitləri və yeni modellər və funksiyalara erkən çıxış kimi imkanlardan yararlana bilər. Bundan əlavə, startap Anthropic komandası ilə əlaqə yaratmaq və digər startapların daxil olduğu icmaya qoşulmaq imkanına da sahib olacaq.
Tuncay Seyidəlinin təsis etdiyi Mnemoria-nın “Claude for Startups” proqramına qəbul olunması layihənin beynəlxalq AI startap ekosistemində inkişafı baxımından mühüm imkan yaradır.
Daha çox
Startap
kateqoriyasından
