74 ölkədə Microsoft xidmətlərində qlobal nasazlıq yaşanıb, serverlər çöküb
Microsoft-un Teams, Outlook və Copilot xidmətlərində genişmiqyaslı bağlantı problemləri yaranıb. Nasazlıq 74 ölkədə istifadəçilərə təsir edib. ABŞ, Yaponiya və Sinqapur da daxil olmaqla müxtəlif regionlarda insanlar elektron poçt, onlayn ünsiyyət və süni intellekt xidmətlərindən istifadə etməkdə çətinlik çəkiblər.
Downdetector platformasının məlumatına görə, Outlook-la bağlı şikayətlərin sayı 140 minə yaxınlaşıb. İstifadəçilər xidmətlərə daxil ola bilmədiklərini, mesaj göndərmək və qəbul etməkdə problemlərlə üzləşdiklərini bildiriblər. Teams və Copilot istifadəçiləri də oxşar nasazlıqlarla qarşılaşıblar.
Microsoft problemin bəzi serverlərin gözlənilmədən əlçatmaz olması nəticəsində yarandığını açıqlayıb. Şirkət xidmətlərin bərpası üzərində işlədiyini, lakin nasazlıqların müəyyən müddət ərzində yenidən təkrarlana biləcəyini bildirib.
Microsoft sistemlərindəki problem digər texnologiya şirkətlərinə də təsir edib. OpenAI və Anthropic xidmətlərində də nasazlıqlar qeydə alınıb. Bu hadisə bir sıra rəqəmsal xidmətlərin eyni infrastrukturdan asılılığını bir daha gündəmə gətirib.
Daha çox
Breaking News
kateqoriyasından
